Dedicate to My REHBAR

میں فقط چلتی رہی منزل کو سر اس نے کیا

 ساتھ میرے روشنی بن کر سفر اس نے کیا

اس طرح کھینچی ہے میرے گرد دیوار خبر

سارے دشمن روزنوں کو بے نظر اس نے کیا

مجھ میں بستے سارے سناٹوں کی لے اس سے بنی 

پتھروں کے درمیان تھی نغمہ گر اس نے کیا

بے سرو ساماں پہ دلداری کی چادر ڈال دی

بے درو دیوار تھی میں مجھ کو گھر اس نے کیا

پانیوں میں یہ بھی پانی ایک دن تحلیل تھا

قطرہ بے صرفہ کو لیکن گہر اس نے کیا

ایک معمولی سی اچھائی کو تراشا ہے بہت

اور فکر خام سے صرف نظر اس نے کیا 

پھر تو امکانات پھولوں کی طرح کھلتے گئے

ایک ننھے سے شگوفے کو شجر اس نے کیا

طاق میں رکھے دیے کو پیار سے روشن کیا

اس دیے کو پھر چراغ رہ گزر اس نے کیا